GENTI A LA BANNA DINTRA

 

Un tali, ca s’avviva ‘mbriacatu,

si ju alluggiàri infìni a la lucanna,

unni truvà a n’autru curcatu,

ca dunmva vutatu di dda banna.

 

‘N’òcchiu di vitru aviva stu cumpagnu,

ca pi li fatti so s’era livatu,

e tra un bicchieri d’acqua misi a bagnu,

supra lu commadinu a lu so latu.

 

Ma chiddu alluciatizzu ed assitatu,

cridennu ca fussi acqua sulamenti,

s’asciuca ddu bicchieri,tuttu a un ciatu,

si curca e dormi pò tranquillamenti.

 

Partì a la prima cursa, a lu matinu,

lassannu lu cumpagnu addummisciùtu,

 chi quannu si sviglià, chiddu scintinu,

l’occhiu ‘un truvannu, ristà sbiguttutu.

 

Ianiu a l’amicu ca ‘un pinsava nenti,

la sbornia oramai c’era passata, quannu bisognu appi, finalmenti,

di ddu surbizzu... nni la ritirata...

 

Cu sforzi e cu dulura ‘un potti jri,

pirchi si ‘ntisi d’èssiri…. attuppatu;

mannà a chiamari un medicu pi diri:

«Mi visitassi, ca sugnu malatu».

 Lu quali, prima accumincia osservari,

lu stomacu, battennu in ogni latu,

 e ‘na dumanna ‘nfinì vosi  fari,

si ficudìnnii, a casu, avìa mangiatu.

 

...Guardannu lu darreri, finalmenti,

lu medicu ristà senza palora!

Po’ dissi: -  Ma cca dintra cci su genti!…

e cci nn’è unu... ca talia fora!

 

 

LU VARBERI A TEMPI ANTICHI

 

 

Era in usu, anticu stili,

ca pi ‘nsigna di mistieri,

lu punzeddu e lu vacili

mittìa fora lu varberi.

 

Lu varberi, anticamenti,

era quasi prufissioni;

salassava, tirava denti,

chiddi tinti e chiddi boni.

 

Appizzava li sanguetti,

canuscìa midicamenti,

e cu scoppi e cu lanzetti,

ci campava onestamenti.

 

Si sbarbava un parrucciànu,

ca li gargi avìa a fussuni

a ddu bonu cristìanu,

ci mittìa ‘mmucca lu pruni.

 

Ora avvinni, ‘na jurnata,

ca un clienti chi sbarbava,

pi ‘mprov-visa tussiàta,

chiddu pruni si cuddava.

 

Di spaventu n’arrisanta!

Ma lu mastru lu cunforta:

-         Chissu è nenti, nun si scanta,

po’ dumani... mi lu porta.

 

Puru ajeri, ad un clienti

comu a lei cci capità:

lu jtta... filicimenti...

chissu stessu... e lu purtà.

 

 

LA JLATINA

 

 

 

Un jomu, s’accattà, ‘na mezza testa

di porcu, e si la fici a jlatina;

la misi pi quagliari, e farla lesta,

fora a lu finisciùni. A la matina

 

primu pinzeri, appena fu susùtu,

di talijari, e custatà ‘stu fattu:

‘nni la nuttata ci aviva sparutu

la jlatina cu tuttu lu piattu!

 

Appi suspetti ca fu lu scarparu,

un so vicinu, ca l’avia arrubatu,

e l’avvicina, masticannu amaru,

dicènnuci, chiuttostu siddiatu:

 

Dicu:   la jlatina, chi fa quaglia,

s’è misa a lu sirenu, tra un piattu?

- Sicuru! cu stu friddu! certu quaglia!

- E a mia mi squaglià... com’è stu fattu?

 

 

LU GRAN SBAGLIU

 

 

Quannu Domineddiu si fu addunatu,

d’Adamu ed Eva lu piccatu fattu,

si l’ammattì davanti, e poi sdignatu,

li jttà fora, dùnnucci lu sfrattu!

 

E dissi ad Eva: «Tu sti mali vogli,

li scuntirài, mentri munnu esisti;

parturirai cu l’atroci dogli,

pi tuttu lu gran dannu ca facisti!

 

A ttia Adamu, sorti miseranna

ti tocca, e ccu suduri lu travàgliu,

senza aspittari di ‘ncelu la manna».

 

Ma nun vi pari ca fici un gran sbàgliu,

lu Patriternu, a dari ‘sta cunnanna?

Veru castigu... è quannu ‘un c’è travagliu!

 

 

 

 

 

 

LU VERU SCECCU

 

 

 

Patri Lu Bruttu era un sacerdoti

senza malizia e troppu simpliciuni;

ma nni sparava grossi, tanti voti,

e cci ‘mmiscava a Diu, pi paraguni.

 

‘Na vota, ca a capizzu si truvava

d’un poviru viddanu muribunnu,

li Sacramenti cci sumministrava,

prima ca si nni jssi a l’autru munnu.

 

Lu sceccu, a la vicina mangiatura,

tutt’a d’un trattu, cumincià a ragliari,

e veramenti fu ‘na stunatura,

nni du momentu gravi a disturbari.

 

Lu muribunnu angustiatu attenta,

tuttu lu tempu ca lu sceccu ràglia,

po’ penza a so muglieri e si lamenta,

la chiama e dici: «Dunacci la paglia».

 

Patri Lu Bruttu, dici risintitu:

«Chi penzi pi lu sceccu, amicu miu,

cunfèssati cu mmia, beddu pulitu;

lu veru sceccu, a stu momentu, è Diu!»

 

 

E’ CACCA!

 

 

 

N’autra vota, mentri cilibrava

la Santa Missa, quannu vinni l’ura

di la Cumunioni, s’accustava

‘na donna, e ‘n brazza, la so criatura.

 

Chi quannu vitti c’ognedunu stava

cu vucca aperta, e poi ad ammuccari

cci parsi, a lu ‘nnuccenti, ca cci dava

a tutti ‘na cusuzza di mangiari.

 

E comu propriu fu vicinu ad iddu,

a lu piattinu subitu s’attacca;

patri Lu Bruttu grida: «Ah picciriddu!

chista ‘un si mangia, beddu miu, è cacca!»

 

 

 

 

L’OCHI DI PALERMU

 

 

 

‘N Palermu, a lu fistinu,

un riccu paisanu,

purtava pi la manu un beddu figliu so.

 

E certi signurini….

‘ncuntraru pi li strati,

cu facci appitturati,

vistuti…. all’airò.

 

- Papà, chi sunnu chissi?

cci vosi addumannari.

- Sunn’ochi... un ci badari,

rispusi, e si zzittì.

 

Pinsà lu figliu, allura:

‘sta cosa nun mi gana,

mi pari cosa strana,

ca l’ochi su accussì!

 

Crisciutu lu picciottu,

duvitti arriturnari

‘n Palermu a studiari,

a l’Università.

 

Lu patri arraccumanna d

i fari sagrifìzii,

e dàricci nutizii,

di chidda gran cità.

 

Scrissi di ddà lu flgliu:

«Bedda è Palermu, o patri,

cc’è villi, cc’è tiatri,

e tanti nuvità...

 

Cc’è cursi di cavaddi,

cci sunnu festi e jiochi,

ma ccbiù di tuttu... l’ochi...

mi piacinu... papà!»

 

 

 

 

 

 

 

 

 

LUCI

 

Lu scuru ca veni ogni sira

e sempri a chidd’ura s’aggira.

 voL diri ca un jornu finì!

 

Dumani matinu c’agghiòrna

lu suli di novu ritorna,

e sempri sarà d’accussì!

 

E poi, a la stessa manera

pinsera... pinsera... pinsera...

pi tutta la vita cci nn’è!

 

Sultantu d’appressu a la morti

si spera benigna la sorti:

la luci di certu dda cc’è.